ენტერპრენერებს დაფინანსების მოთხოვნისას ხშირად წარმოდგენა არ აქვთ იმაზე, თუ რამდენად მეტი თანხა სჭირდებათ რეალურად. თუმცა, ეს გასაკვირი არ არის. არავის ეხალისება ისეთ შემაშინებელ თემებზე ფიქრი, როგორიცაა კომპანიის ტექნიკური ვალი და ყოველთვიური გადასახადები. მიუხედავად ამისა, მათ მაინც ინვესტიციის დანაკლისი უნდა აშინებდეთ უფრო მეტად. ენტერპრენერული წამოწყების სწორად განვითარებისთვის აუცილებელიც კია იმის განსაზღვრა, თუ რამხელა კაპიტალი სჭირდება ბრენდს საწყის ეტაპზე. აღნიშნული თანხის ოდენობა რამდენიმე ფაქტორზეა დამოკიდებული. ასეთი ასპექტების სიაში შედის ბიზნესის სფერო, ბიზნესის მოდელის ფორმა, განვითარებისთვის დასახული მიზნები და საოპერაციო ხარჯები.
საჭირო ინვესტიციისა და კაპიტალის რაოდენობის გამოთვლაში ამ 7 ფაქტორის გათვალისწინება დაგეხმარებათ:
1. ინდუსტრიისა და ბაზრის დინამიკა
სხვადასხვა ინდუსტრიებს განსხვავებული კაპიტალის მოთხოვნილებები აქვთ, მათი ბაზრის დინამიკის და კონკურენტუნარიანობის დონის მიხედვით. დიდი კაპიტალის საჭიროების მქონე სფეროებში შედის საწარმოო საქმიანობა, ბიოტექნოლოგიების წარმოება და აერონავტიკა. აღნიშნულ ინდუსტრიაში საწყის ეტაპზევე შესაძლოა საჭირო იყოს დიდი ინვესტიციების ჩადება აღჭურვილობის, ინფრასტრუქტურისა და კვლევების ასპექტებში. სერვისებზე მორგებულ და ტექნოლოგიური თემატიკის სტარტაპებს საჭირო პერსონალის მოსაძიებლად, პროდუქტის დეველოპმენტისთვის და მარკეტინგისთვის ბევრად უფრო ნაკლები კაპიტალი სჭირდებათ.
2. ბიზნესის მოდელი და განვითარების სტრატეგია
ისეთ სტარტაპებს, რომლებიც სწრაფ განვითარებასა და მარკეტის გაფართოებას გეგმავენ, უფრო მეტი კაპიტალი ესაჭიროებათ აგრესიული მარკეტინგული კამპანიებისთვის, პროდუქტების სწრაფი განახლებისთვის და მომხმარებელთან ურთიერთობის სერვისის განვითარებისთვის. ორგანულ ზრდაზე ორიენტირებულ სტარტაპებს ნაკლები კაპიტალის საჭიროება აქვთ საწყის ეტაპზე, თუმცა მათთვის რესურსების სწორი განაწილების და საოპერაციო ნაწილის ეფექტურობის უზრუნველყოფა აუცილებელია.
3. საოპერაციო ხარჯები
სტარტაპებს ისეთი ხარჯების დაფარვა უწევთ, როგორიცაა ხელფასები, ქირა, კომუნალური გადასახადები, მარკეტინგის ბიუჯეტი და ტექნოლოგიური ინფრასტრუქტურის გასამართი პროცესებისთვის საჭირო თანხები. სტარტაპის მიერ საოპერაციო ბიუჯეტის ხარჯვის სისწრაფის გამოთვლა აუცილებელია საწყისი კაპიტალის სწორი რაოდენობის გამოსათვლელად. ფულის სწრაფად მხარჯავ სტარტაპებს ბევრად დიდი საწყისი ინვესტიცია სჭირდებათ, რათა პრობლემების გარეშე შეძლონ ფინანსური მოგების ეტაპამდე მისვლა და ახალი ინვესტიციების მოპოვება.
4. ტალანტის დაქირავება და შენარჩუნება
მაღალი დონის პერსონალის მოზიდვა და შენარჩუნება სტარტაპისთვის აუცილებლობად ითვლება. თუმცა, ხშირად ეს დიდ ხარჯებთანაა დაკავშირებული. შესაბამისად, ენტერპრენერებს შესაძლოა მოზრდილი ბიუჯეტის გადადება მოუწიოთ კონკურენტუნარიანი ხელფასების, თანამშრომლების ბენეფიტებისა და მათი შენარჩუნებისთვის საჭირო ტრენინგების უზრუნველსაყოფად. ადამიანურ რესურსში ინვესტიცია აუცილებელია ინოვაციების დანერგვისთვის, განვითარების სტრატეგიების შესრულებისთვის და ისეთი ძლიერი ორგანიზაციული სტრუქტურის ჩამოყალიბებისთვის, რომელიც გრძელვადიან წარმატებას უზრუნველყოფს.
5. პროდუქტის დეველოპმენტი და ინოვაციები
სტარტაპებისთვის მნიშვნელოვანია პროდუქტის დეველოპმენტსა და ინოვაციებში ინვესტიციის ჩადება, რათა ბაზარზე კონკურენტებისგან განსხვავებული და გამორჩეული ბრენდის იმიჯი მოიპოვონ. შესაბამისად, მათ შეიძლება დასჭირდეთ კაპიტალი დეველოპმენტის საწარმოებლად, პროტოტიპების შესაქმნელად, დასატესტად, რეგულაციების მოთხოვნების დასაკმაყოფილებლად და ინტელექტუალური საკუთრების დასაცავად. პროდუქტის დეველოპმენტისთვის საკმარისი რესურსების გამოყოფა უზრუნველყოფს მაღალი ხარისხის და ბაზრისთვის მზად მყოფი პროდუქტის შექმნას, რაც ლოიალური მომხმარებლების აუდიტორიის შექმნას განაპირობებს.
6. მარკეტინგი და მომხმარებლების მოზიდვა
მარკეტინგი სტარტაპის განვითარებაში მნიშვნელოვან როლს თამაშობს ბრენდის ცნობადობის, ლიდების გენერაციისა და მომხმარებლების მოზიდვის საშუალებით. შესაბამისად, სტარტაპებს შესაძლოა ცალკე კაპიტალის გამოყოფა დასჭირდეთ ისეთ მარკეტინგული ინიციატივების დასაფინანსებლად, როგორიცაა სარეკლამო კამპანიები სოციალურ ქსელებში, კონტენტის მარკეტინგი, სარეკლამო ღონისძიებები და პარტნიორობები. მარკეტინგში ინვესტიციის ჩადება აუცილებელია სამიზნე აუდიტორიისთვის რელევანტური მარკეტინგული კამპანიების შესაქმნელად და მომხმარებელთან ეფექტური კომუნიკაციის საწარმოებლად. ეს ბრენდის ღირებულების და შემოსავლის გაზრდის შანსს ზრდის.
7. რეგულაციების შესრულება და იურიდიული ხარჯები
რეგულაციების მოთხოვნილებებისა და სტანდარტების დაცვა და იურიდიული საჭიროებების უზრუნველყოფა სტარტაპების ლეგალური ოპერირებისთვის აუცილებელია. შესაბამისად, აუცილებელია კაპიტალის გამოყოფა იურიდიული ოპერაციებისთვის, ლიცენზიებისთვის, ნებართვებისთვის და დაზღვევისთვისაც. მსგავსი სტანდარტების დაუცველობამ შესაძლოა გამოიწვიოს ჯარიმების დაკისრება და რეპუტაციის შელახვა, რაც სტარტაპის განვითარებას მნიშვნელოვნად შეაფერხებს და მის სანდოობას ეჭვქვეშ დააყენებს.
