ამერიკაში ყველაზე პოპულარული გაზიანი სასმელების სიაში „Dr Pepper“-მა „პეპსის“ გადაუსწრო და მეორე ადგილი დაიკავა, პირველ ადგილზე მყოფი კოკა-კოლის გვერდით. მომხმარებლების აზრით, „Dr Pepper“-ი კონკურენტებისგან ბევრად უფრო გამორჩეული სასმელია, ვიდრე „პეპსი“. აღნიშნული ინფორმაცია „FutureBrand“-ის სტრატეგიის დეპარტამენტის ხელმძღვანელმა, ლაინ ფილდმა გამოაქვეყნა. აღსანიშნავია, რომ „Dr Pepper“-ის მწარმოებელი კომპანია 2018 წელს „Keurig Green Mountain“-მა შეიძინა. ამის შემდეგ, ბრენდის მარკეტინგული ხარჯები კიდევ უფრო მეტად გაიზარდა. ამასთანავე, კომპანიის პრიორიტეტად სწორედ აღნიშნული ბრენდის განვითარება იქცა. აღნიშნული მიზნისკენ არამარტო მარკეტინგის დეპარტამენტის, არამედ მთელი ორგანიზაციის ფოკუსი იქნა მიმართული.
პირველი სვლა კოლეჯის ფეხბურთში
2014 წელს, „Dr Pepper“-ი კოლეჯის საფეხბურთო ლიგის პლეიოფების პირველი ოფიციალური სპონსორი გახდა. მას შემდეგ უკვე დიდი ხანია, რაც ბრენდის მარკეტინგული სტრატეგია კოლეჯის საფეხბურთო ლიგის ირგვლივ ეწყობა. 2018 წელს კომპანიამ წამოიწყო გრძელვადიანი მარკეტინგული კამპანია „Fansville”, რომელიც კოლეჯის ფეხბურთის თემატიკაზე გადაღებული ცნობილი შოუების პაროდიას წარმოადგენს. აღნიშნული კამპანია მოიცავს ყოველწლიურად ისეთი ვიდეო კონტენტის შექმნას, რომელიც სპორტის ფანებისთვის ყველაზე რელევანტურ თემებს ეხმიანება.
კომპანიის წარმომადგენლები თვლიან, რომ კოლეჯის ფეხბურთი კიდევ უფრო ეფექტური და კრეატიული პროცესების ნაწილად შეიძლება იქცეს. ამის მაგალითად ასახელებენ ისეთ პროექტებს, როგორიცაა ორიგინალური ფრჩხილის ლაქის ნაკრების, „“FANicures”-ის გამოშვება. აღნიშნული პროდუქტი საფეხბურთო ჩემპიონატის გამარჯვებულ ფეხბურთელთან, კალებ უილიამსთან კოლაბორაციის შედეგად შეიქმნა. უილიამსის ერთ-ერთ დამახასიათებელ ასპექტს სწორედ მოედანზე სწორედ ორიგინალურად მოხატული ფრჩხილებით გამოსვლა წარმოადგენს. აღნიშნული ტრადიცია „Dr Pepper“-ის მარკეტინგულ კამპანიაში საკმაოდ ეფექტურად იქნა გამოყენებული.
ინოვაცია იწვევს ხალხის მოზიდვას
გაზიანი სასმელების ბაზარზე ყოველთვის არსებობდა ახალი გემოების საშუალებით ხალხის მოზიდვის ტენდენცია. „კოკა-კოლა“ აღნიშნულ ასპექტს აქტიურად იყენებს გლობალური მარკეტინგული კამპანიების დაგეგმვისას, ხოლო „პეპსი“ სეზონურ გემოებს ქმნის ახალი აუდიტორიის მოსახიბლად. ასევე, საკმაოდ დიდი პოპულარობით სარგებლობს „Dr Pepper“-ის მიერ შექმნილი ახალი გემოები. მაგალითად, მარწყვის და კრემის გემოთი შექმნილი „Dr Pepper“-ის ვარიაციის გაყიდვებმა 300 მილიონ დოლარზე მეტი შემოსავალი მოუტანა კომპანიას. მიუხედავად ამისა, მსგავსი მარკეტინგული გადაწყვეტილებების მიღებისას „Dr Pepper“-ის გუნდი პირველ რიგში ბალანსის დაცვაზე ზრუნავს. კომპანიისთვის მნიშვნელოვანია ახალგაზრდა აუდიტორიისა და ახალი კლიენტების მოზიდვა ინოვაციური გემოების შექმნით. თუმცა, მათ არ სურთ ორიგინალი „Dr Pepper“-ის გემოებისგან ზედმეტად განსხვავებული პროდუქტების შექმნა. მათ მარკეტინგულ წარმატებაზე ეს საკმაოდ დიდ გავლენას ახდენს.
მოქნილი მარკეტინგული მოდელი
„Dr Pepper“-ის აუდიტორია საკმაოდ დიდი ლოიალობითა და პროდუქტის ხშირი მოხმარებით გამოირჩევა. ბრენდის მიმართ ასეთი პოზიტიური დამოკიდებულება ყველაზე მეტად მაშინ ხდება აშკარა, როდესაც კომპანია უახლეს ტრენდებზე მორგებულ კონტენტს აქვეყნებს. ამის ერთ-ერთ მაგალითს წარმოადგენს TikTok-ზე გავრცელებული ტრენდი, რომლის მონაწილე ადამიანებიც გაზიან სასმელებს კიტრის მწნილს უმატებდნენ. „Dr Pepper“-ის მიერ დროულად გამოქვეყნებული ტრენდული ვიდეო მილიონობით ადამიანის სალაპარაკო თემად იქცა.
„Dr Pepper“-ის მარკეტინგის გუნდი საკმაოდ მოქნილი მუშაობის სტილით გამოირჩევა. მათ გააჩნიათ საკმარისი თავისუფლება იმისათვის, რომ სწრაფად და სხვების დასტურის გარეშე შექმნან უახლეს ტრენდებზე მორგებული კონტენტი. სწორედ ასეთი მოქნილი მუშაობის სტილის დახმარებით შეძლო „Dr Pepper“-მა საკუთარი წარმატებისთვის გამოეყენებინა ისეთი ასპექტები, როგორსაც კოლეჯის ფეხბურთი და ინოვაციური გემოს ვარიაციები წარმოადგენს.
ეფექტური მარკეტინგული სტრატეგიების წყალობით „Dr Pepper“ გაზიანი სასმელების ლიდერ ბრენდებს გაუტოლდა. თუმცა, კომპანიას საკუთარ კონკურენტებთან საკმაოდ უცნაური ურთიერთობა აქვს. მისი პროდუქციის დისტრიბუციას სწორედ „კოკა-კოლა“ და „პეპსიკო“ ახორციელებენ. სწორედ ამიტომ, „Dr Pepper“-ის წარმომადგენლების მიზანია წვლილი შეიტანონ როგორც ბრენდის განვითარებაში, ისე მისი მფლობელი კომპანიის, დისტრიბუტორების და საცალო გაყიდვების ხაზის წარმომადგენლების წარმატებაშიც.
