Checkout-ის და ზოგადად გადახდის გვერდების დიზაინი ვებგვერდის ეფექტურობასა და ინტერაქციების სიხშირეზე დიდ გავლენას ახდენს. შესაბამისად, წარმოგიდგენთ აღნიშნული ეტაპისთვის შესაფერისი დიზაინის მაგალითებს, რომლებიც ეფექტური Checkout-ის გვერდის შექმნის ინსპირაციად შეგიძლიათ გამოიყენოთ:
Rollink
Rollink-ის მიერ შერჩეული დიზაინი კუპონის ველს, კალათის შიგთავსს, გადახდების სხვადასხვა მეთოდსა და შეკვეთის გაფორმების გამოკვეთილ “CTA” ღილაკს მოიცავს.
აღნიშნული ინტერფეისი იუზერზე მორგებული დიზაინის მაგალითს წარმოადგენს და მომხმარებლებს ინტუიციურ განმარტებებსაც სთავაზობს იმის შესახებ, თუ რა დეტალების ჩაწერაა საჭირო საინფორმაციო ველებში.
Etsy
“Etsy” გლობალური კომერციული პლატფორმაა, რომელიც ინდივიდებსა და ენტერპრენერებს ემსახურება. აღნიშნული ბრენდის „checkout“-ის პროცესის სიმარტივე ეფექტური დიზაინის ერთ-ერთ საუკეთესო მაგალითად ითვლება.
სასურველი პროდუქტების კალათაში დამატების და ყიდვის ღილაკზე დაჭერის შემდეგ, ინტერფეისი რეგისტრაციის სხვადასხვა ვარიანტს გთავაზობთ. ამასთანავე, თქვენ საშუალება გაქვთ ყიდვის პროცესი სტუმრის სტატუსით გააგრძელოთ. აღნიშნული ეტაპის შემდეგ მხოლოდ ერთ გვერდიანი ფორმის შევსებაა საჭირო შეკვეთის გასაფორმებლად.
Sigma Beauty
თავის მოვლის პროდუქტების ცნობილი ბრენდის ვებგვერდი საკმაოდ მარტივი და ეფექტური Checkout-ის პროცესით გამოირჩევა. შესყიდვის გვერდზე გადასვლისას თქვენ მხოლოდ ორი მარტივი ნაბიჯის გავლა: მიტანისა და გადახდის მეთოდის არჩევა გჭირდებათ.
გადახდის გვერდი ასევე მიტანის სერვისის რამდენიმე სახეობას გთავაზობთ. ამის დამსახურებით თვითონ მომხმარებლებს ენიჭებათ იმის არჩევის უფლება, თუ რამხელა თანხის დახარჯვა სურთ მიწოდების სერვისის გამოყენების სანაცვლოდ. ამასთანავე, Sigma-ს ინტერფეისი თქვენს მიერ არჩეული პროდუქტებისა და ვარიანტების შენახვის საშუალებასაც გაძლევთ, რათა მომავალში ვებგვერდზე დაბრუნების შემთხვევაში ტრანზაქციების შესრულება კიდევ უფრო მეტად გაგიმარტივდეთ.
Casper
Casper-ის „Checkout“ გვერდი იუზერებს ყველა საჭირო დეტალს სთავაზობს იმისათვის, რომ მათ ინფორმირებული და ჭკვიანური შენაძენი გააკეთონ. სუფთა და მინიმალისტური დიზაინი შეკვეთის დეტალებს გვერდით გამოტანილი ჩამონათვალის სახით გთავაზობთ. აღნიშნული ინტერფეისში ყველაფრის საფასური დეტალურადაა ჩამოთვლილი და ასევე მოიცავს ინფორმაციას იმის შესახებ, თუ რა უპირატესობებით ისარგებლებთ Casper-ის პროდუქტების შეძენის შემთხვევაში.
Casper-ის დიზაინის ყველაზე დიდ უპირატესობას ჩატის ბოტი წარმოადგენს. აღნიშნული ბრენდი Checkout-ის გვერდზევე გთავაზობთ მაღაზიის კონსულტანტთან გასაუბრებას, რათა ყველანაირი გაუგებრობა და დაბნეულობა აირიდოთ თავიდან, პროდუქტების მშვიდად შესაძენად.
Babies R Us
ორიგინალური სათამაშოებითა და ხარისხიანი პროდუქტებით ცნობილი მაღაზიის ვებგვერდი ყიდვის პროცესის გასამარტივებლად საჭირო ყველა დამხმარე ელემენტს სთავაზობს იუზერებს. მათ შორის ყველაზე ეფექტურ ასპექტს ვიზუალური მანიშნებლები წარმოადგენენ. აუცილებლად შესავსები ველების გამოტოვების შემთხვევაში ისინი წითელ ფერს იღებენ, რათა მომხმარებლის ყურადღების მიქცევა და ყველა საჭირო ინფორმაციის შევსება უზრუნველყონ. ასეთი მიდგომის გამოყენებით, ბრენდი მომხმარებლებს ნდობის შეგრძნებას უღვივებს ყიდვის პროცესის პარალელურად.
Samsung
ტექნოლოგიების სექტორში ცნობილი კომპანიის ვებგვერდი ასევე საკმაოდ ეფექტური დიზაინით გამოირჩევა. Checkout-ის გვერდზე მომხმარებლებს ყველა ის საჭირო ასპექტი ხვდებათ, რომელიც მომხმარებლის მიერ ყიდვის პროცესის ბოლომდე მიყვანის შანსს ზრდის. ასეთი ელემენტების სიაში შედის სხვადასხვა გადახდის მეთოდებს შორის არჩევანის გაკეთების შესაძლებლობა და დიზაინში ინტეგრირებული ემბლემები, რომლებიც ბრენდის სანდოობას უსვამს ხაზს.
Samsung-ის გადახდების გვერდის დიზაინი ასევე პრომო კოდის ჩასაწერ ველს და გადასახდელი თანხის გადანაწილების რამდენიმე ვარიანტსაც სთავაზობს მომხმარებლებს. პრაქტიკულობის გაზრდის მიზნით, Samsung-ის ვებგვერდი ასევე თქვენი პროდუქტების კალათის რეალურ დროში ჩასწორების ფუნქციასაც გთავაზობთ. შესაბამისად, სასურველი შენაძენის გაკეთება გვერდის დატოვების გარეშე, სწრაფად და მარტივადაა შესაძლებელი.
